ARLeF: un gnûf sucès pe Stafete des Lenghis Minoritariis dal Friûl
“Acet spetacolâr intai Comuns di passaç, segn dal contribût che il sport al pues dâ par rinfuarçâ il sens di apartignince”, al dîs Bordon. La edizion 2019 si tignarà a Gurize
Un grup di 150 atletis par un percors complessîf di 118 chilometris, une ventine di associazions coinvoltis e un centenâr di scuelârs “partecipantis”, al è il belanç plui che positîf de seconde edizion de Stafete des Lenghis Minoritariis dal Friûl che e à acompagnât lis tantis celebrazions de Fieste de Patrie dal Friûl 2018. La manifestazion sportive e jere promovude de Regjon e de ARLeF (Agjenzie Regjonâl pe Lenghe Furlane) e coordenade de Associazion Maratonine Udinese.
«Dapardut là che o sin passâts – al dîs Paolo Bordon, president de Associazion Maratonine Udinese – o vin vût un bon acet plen di entusiasim. O crôt che chest al sedi un dai contribûts miôr che il sport al pues dâ par rinfuarçâ il sens di apartignince che intal nestri câs, al va adun cul leam cu la lenghe furlane e cu la culture dal multilinguisim. Un ringraciament di cûr al va a ducj i colaboradôrs, i protagoniscj e lis istituzions che a àn volût e poiât cheste biele esperience cu la sperance di cjatâsi pe tierce edizion de Stafete».
«Graciis a une adesion istituzionâl e popolâr cressinte, la Stafete si propon tant che une manifestazion consolidade dentri des tantis iniziativis celebrativis de Fieste de Patrie. Ancje par chest, o sin za daûr a lavorâ par jentrâ intal circuit european des manifestazions similis (la Korrika basche, par esempli) e par organizâ la edizion 2019 che e passarà pai comuns de zone di Gurize», e dîs la presidence de ARLeF.
La Stafete e je partide sabide ai 7 di Avrîl, di Aquilee e e à passât i Comuns di Flumisel, Rude, Cjamplunc, Dael, Visc, Palme, Gonârs, Cjasteons di Strade, Talmassons, Bertiûl, Codroip, Vildivar, Morsan da lis Ocjis, Cordovât, Siest, San Vît dal Tiliment, Cjasarse, Sant Zorç da la Richinvelde, San Martin dal Tiliment e Voleson Darzin (chi i ultins atletis a son rivâts aes 16.00 di domenie ai 8 di Avrîl) dulà che, a spietâju, e jere Alessandra Segato, zovine pordenonese che e à la posizion numar 25 te classifiche mondiâl de scherme. Dilunc dal percors, ai coridôrs de stafete ur è stât dât il bon acet dai Sindics e des associazions locâls di arme e fra chestis ancje chê dai carabinîrs di “Settembreinvita”. Ai ponts di ristôr, a jerin i prodots tipics di Aqua, tutelâts dal Ersa.
Par che la doi dîs sportive e funzionàs in maniere impecabile, al à lavorât un grup di 20 personis de Associazion Maratonine Udinese, cu la presince de Crôs Rosse Taliane e l’acompagnament de Motostafete furlane cui siei 6 motocicliscj.
L’event al marche, in maniere simboliche, la impuartance des diviersis identitâts linguistichis presintis inte Patrie dal Friûl, cu la partecipazion di atletis furlanofons, slovenofons e gjermanofons di diviersis societâts sportivis no agonistichis che a puartin, tant che testemoni, il test de Bole Imperiâl di Indrì IV e lu consegnin aes Aministrazions locâls dai Comuns li che la Stafete e passe. Il sproc de manifestazion al è: “La nestre Patrie, lis nestris lenghis-Naša Domovina, naši jeziki-Unsere Heimat, unsere Sprachen-La nostra Patria, le nostre lingue-Our Homeland, our languages”.
