La riproduzion storiche dal drap di Beltram: il gnûf simbul de Fieste de Patrie dal Friûl
Intal 2021, pes celebrazions de Fieste de Patrie dal Friûl, e jere stade screade tal Museu dal Domo di Udin la prime riproduzion tatile de bandiere dal Beât Patriarcje Beltram. Chest an il simbul de Patrie al torne protagonist des celebrazions: pe ocasion l’Istitût Ladin Furlan “Pre Checo Placerean” e la ARLeF a àn domandât al artist Francesco Pellegrini di realizâ une riproduzion dal drap maraveôs, e in chescj mês, al à fat un studi su lis telis origjinâls e sui colôrs (vuê par fuarce smamîts par vie dal passâ dal timp) par podê prontâ une copie dal dut fedêl ae bandiere storiche. Cheste, di cumò indenant, e sarà “il testemoni” che i sindics si scambiaran al principi de cerimonie civîl celebrade te zornade de Fieste.
La bandiere dal Friûl e je un dai simbui inconfondibii de Patrie, là che ducj i furlans, ancje i coregjonâi tal forest, si ricognossin. E je une des plui antighis de Europe, e e je ricognossude, inte version moderne, de leç regjonâl numar 27 dal 2001. La acuile eraldiche di aur cu lis alis viertis suntun fonts celest che o sin usâts a viodi svintulâ fûr des cjasis e dai Comuns, si ispire al esemplâr antîc e preziôs in mostre tal Museu dal Domo di Udin, che al rimonte al secul XIV: un drap di forme cuadrangolâr, di sede colôr grîs celest, cun tal mieç une acuile cul cjâf voltât a çampe. Il cuarp, lis çatis e lis alis a son di colôr zâl, lis sgrifis di colôr ros.
La origjin de bandiere e rimonte ai timps dal Stât patriarcjâl furlan, e faseve part dal furniment funerari dal patriarcje Beltram di Saint Geniès, restât su la catidre di Aquilee dal 1334 al 1350 e copât in maniere barbare di une conzure di nobii furlans. Il simbul de acuile, lu confermin i reperts numismatics, al caraterizave il Stât patriarcjâl furlan za sot di Volchîr di Erle, patriarcje di Aquilee dal 1204 al 1218.
Pe Fieste de Patrie 2023 e je di segnâ ancje une altre novitât, o ben la realizazion di un gnûf video dedicât al Imni dal Friûl. Un progjet realizât dal Istitût Ladin Furlan “Pre Checo Placerean” in colaborazion cu la ARLeF, cul côr “VocinVolo-Ritmea” di Udin – direzût di Lucia Follador – che al interpretarà une version classiche di “Incuintri al doman” (test di Renato Stroili Gurisatti e musiche di Valter Sivilotti). Lis vôs a saran acompagnadis di Alessio Domini al piano. Dut intal incjant de senografie di vile Gallici-Deciani, a Montegnà di Cjassà.
