“Una splendida favella” Dute la storie de lenghe furlane, in 60 minûts

 La performance, cun Flavio Santi e William Cisilino, e je in program ai 11 di Mai li de Tor di Sante Marie, te suaze di Vicino/lontano

Sessante minûts par contâ plui di mil agns di storie de lenghe furlane. Une vere sfide, che Flavio Santi e William Cisilino a àn volût acetâ. “Una splendida favella – L’avventurosa storia della lingua friulana e della sua letteratura” al è in program par sabide ai 11 di Mai, aes 17.30, te Tor di Sante Marie (vie Antonio Zanon 24, Udin). L’event, cun jentrade libare, al è promovût de ARLeF – Agjenzie regjonâl pe lenghe furlane te suaze di Vicino/lontano, il festival culturâl une vore innomenât dulà che la Agjenzie e colabore di plui di dîs agns cun chê di fâ lûs in particolâr sul teme dal furlan, e in gjenerâl su chel dal plurilinguisim.

Santi e Cisilino a tocjaran, cun finece e ironie, i fats che a àn puartât ae nassite dal furlan e al so afermâsi tant che lenghe: «E sarà une ocasion par fâ un viaç inedit te storie de lenghe furlane. O capirìn trop che la lenghe, ancje chê di vuê, e je stade influençade des popolazions che a son passadis pal Friûl vie pai secui. Lu fasarìn tacant dal furlan di ducj i dîs, dulà che a son peraulis e mûts di dî che a àn lis lôr lidrîs intai secui passâts. Al sarà un viaç che nus puartarà fin a vuê, par po capî cuâl che al sarà il furlan di doman e, in gjenerâl, cemût che a funzionin lis lenghis”, al à anticipât Cisilino, diretôr de ARLeF. Cheste e sarà une ocasion par rispuindi a domandis tant che: Cuâi sono i popui che a àn dât forme ae lenghe ladine plui orientâl? Cui sono lis feminis e i oms che, za de Ete di Mieç, a àn sielzût di rivendicâ l’ûs de marilenghe par fâ art? Ma soredut: parcè il furlan isal une lenghe?

Tal percors dal furlan, la leterature e à dât un contribût fondamentâl, al ricuarde Santi, docent di divignince furlane te Universitât de Insubria, vincidôr dal premi “Viareggio-Rèpaci”, pe poesie, tal 2021, e ancje autôr di dôs racueltis di poesiis par furlan. «O cirarai di dimostrâ trop che la leterature furlane e sedi di simpri une vore moderne, in linie cu lis leteraturis talianis e europeanis, e che no à nuie di mancul di chestis. A tacâ des primis poesiis (al pâr adiriture che une e fos stade notade di Dante), passant pai scrits di Ermes di Colorêt, Catarine Percude, par rivâ fin a Pier Paolo Pasolini e ancje a un dai prins esemplis di test televisîf recitât dal dut par furlan e lât in onde su la tierce rêt tai agns ’80, cuant che e jere a pene nassude. O leiarai ancje cualchi poesie che e dimostre la grandece e la origjinalitât dal furlan».

Une performance a dôs vôs che e piturarà, ancje midiant di une conte par imagjins, un ritrat inedit de lenghe furlane, tant che sintesi des culturis che tai secui a àn traviersât il Friûl.

William Cisilino al è diretôr de ARLeF, la Agjenzie regjonâl pe lenghe furlane. Al è stât vicepresident dal NPLD, la rêt europeane des lenghis minoritariis. Al à publicât varis saçs su la tutele des minorancis linguistichis e su la lenghe e la culture furlane.

Flavio Santi al insegne te Universitât de Insubria di Como-Varese. Al volte autôrs classics e contemporanis. Al à scrit di vampîrs, precaris, supererois, ma soredut dal Friûl, che al conte in variis racueltis di poesie. Al è autôr di tancj romançs e saçs sientifics.